Русија увезува гориво за авиони од Јапонија поради нападите врз рафинериите

Русија, која се соочува со криза со гориво по украинските напади врз нејзината енергетска инфраструктура, се подготвува да увезе пратка гориво за авиони со потекло од Јапонија преку трговци, велат три извори запознаени со ова прашање. Тоа е редок потег за големиот производител на нафта, кој сега е принуден да се сврти кон увоз за да ги задоволи домашните потреби, објавува „Ројтерс“.

Пратка од најмалку 200.000 барели гориво за авиони треба да биде натоварена во јапонското пристаниште Чиба во првата половина на јули, според два извори. Потоа товарот ќе биде испратен во Јужна Кореја, а во договорот се вклучени неколку трговци.

Потоа се очекува горивото да биде префрлено во друг танкер, веројатно преку трансфер од брод до брод во близина на јужнокорејското пристаниште Јеосу, пред да се упати кон Русија. Крајната дестинација на пратката сè уште не е позната. Изворите сакаа да останат анонимни бидејќи не се овластени да даваат изјави за медиумите.

Руското Министерство за енергетика, како и надлежните министерства во Јужна Кореја и Јапонија, не одговорија веднаш на барањата за коментар.

Колку е редок увозот на гориво за авиони, покажуваат податоците од компанијата за следење на бродови „Кплер“, според кои последната таква пратка во Русија е регистрирана во февруари 2022 година. Потоа 22.000 барели беа испорачани од јужнокорејскиот Јеосу до Владивосток.

Во исто време, извозот на руско гориво за авиони падна на околу 13.000 барели дневно оваа година, главно во Турција. За споредба, минатата година Русија извезуваше околу 30.000 барели гориво дневно, според податоците на „Кплер“.

 

фото/Depositphotos

Текстот Русија увезува гориво за авиони од Јапонија поради нападите врз рафинериите е превземен од МАКФАКС.