Се вклучија алармите поради чад на Меѓународната вселенска станица

Противпожарни аларми се активирале на Меѓународната вселенска станица откако екипажот пријавил чад и мирис на запалена пластика.

Се се случило во делот од станицата познат како Ѕвезда, изграден од страна на Русите, а во тој дел има и простории за живот на астронаутите.

Оваа вселенска станица станува се постара, а во текот на годините доживеа серија дефекти, додека руски официјален претставник неодамна предупреди за застарен хардвер и неисправни системи.

Руската вселенска агенција „Роскосмос“ објави дека сите системи се вратени во нормала.

Чадот бил забележан при полнење на батериите, а мирисот на запалена пластика се проширил од рускиот во американскиот дел.

Меѓународната вселенска станица е изградена во 1998 година како дел од заеднички проект на Русија, САД, Канада и Јапонија, како и неколку европски земји.

Оригиналниот план беше да трае 15 години и станицата е дизајнирана според тие параметри.