Фон дер Лајен: Пристапувањето на Украина во ЕУ е клучна безбедносна гаранција

Претседателката на Европската комисија, Урсула фон дер Лајен, изјави дека пристапувањето на Украина во Европската Унија е клучен дел од идните безбедносни гаранции на земјата.

Нејзината изјава доаѓа по разговорите меѓу европските лидери за мировните преговори кои заглавија откако Русија ја обвини Украина за напад врз приватната резиденција на Владимир Путин, објави Euronews.

По видео повикот со лидерите на Германија, Франција и Полска како дел од Берлинскиот формат, Фон дер Лајен нагласи дека членството во Унијата „само по себе претставува клучна безбедносна гаранција“.

„На крајот на краиштата, просперитетот на слободната украинска држава лежи во пристапувањето кон ЕУ“, објави таа на социјалните мрежи.

„Пристапувањето не им користи само на земјите што се приклучуваат; како што покажаа последователните бранови на проширување, тоа и користи и на самата Европа.“

Нејзините коментари уследија по една недела интензивна дипломатска активност меѓу американските, украинските и европските претставници. Украинскиот претседател Володимир Зеленски по состанокот со американскиот претседател Доналд Трамп изјави дека безбедносните гаранции меѓу трите страни се „скоро договорени“.

 

фото/депозитфотос

Текстот Фон дер Лајен: Пристапувањето на Украина во ЕУ е клучна безбедносна гаранција е превземен од МАКФАКС.