(Фото+видео) „Летечка Бела куќа“: Трамп го претстави авионот што му го подари Катар

Американскиот претседател Доналд Трамп го претстави новиот авион „Боинг 747-8“ кој во иднина ќе служи како „Ер Форс Ван“. Станува збор за луксузно летало кое катарската влада минатата година им го донираше на Соединетите Американски Држави како „безусловен“ подарок.

Американската војска ги заврши темелните преинсталации на авионот, чија вредност се проценува на околу 400 милиони долари.

„Овој авион е претворен во летечка Бела куќа на ниво на луксуз какво што никој досега нема видено“, изјави Трамп за време на својот говор во воената база „Џоинт Бејс Ендрјус“.

AIR FORCE ONE | 25-3300@USAirForce pic.twitter.com/pMqxY3twkM

— Dan Scavino (@Scavino47) June 20, 2026

Елиминирани сите безбедносни ризици

Од американското воено воздухопловство соопштија дека авионот сега започнува со пробни летови, кои беа опишани како „завршен испит“ за тестирање на модификациите пред тој и официјално да биде ставен во служба на претседателот.

Според официјалното соопштение, воените инженери извршиле напредни измени во:

– Безбедносните системи и мисиските комуникации;

– Логистичката поддршка и имплементацијата на напредни технологии;

– Целосна проверка на минатото на леталото, со што се елиминирани сите потенцијални безбедносни ризици поврзани со фактот дека авионот претходно бил во сопственост на друга држава.

Внатрешноста на авионот претрпела помали измени, додека надворешноста е обоена во препознатливите црвена, бела, сина и златна боја. Катарското кралско семејство во мај 2025 година го донираше овој луксузен Боинг на американското Министерство за одбрана.

NEW AIR FORCE ONE! pic.twitter.com/8DcY6ZErsy

— The White House (@WhiteHouse) June 19, 2026

Бран критики и одговорот на Белата куќа

Прифаќањето на подарокот предизвика сериозни критики во Вашингтон и кај демократите и кај републиканците, вклучително и кај некои од сојузниците на Трамп. Критичарите тврдат дека подарок со ваква вредност претставува директен судир на интереси и може да биде во спротивност со американскиот Устав.

Иако сојузните прописи на САД предвидуваат дека официјалните лица можат да прифаќаат подароци со максимална вредност до 480 долари, Белата куќа инсистира дека сè е според законот и најави дека по завршувањето на мандатот на Трамп, авионот ќе биде предаден на неговата претседателска библиотека.

„Кога ќе го видите квалитетот на изработката на овој авион, нема да им верувате на сопствените очи. Квалитетот на дрвото, на материјалите, на моторите – тие мотори се најдобрите во светот. Сакам да му се заблагодарам на катарскиот емир“, порача Трамп.

Привремено решение до испораката на новите воени авиони

Пред пристигнувањето на катарскиот авион, претседателската флота ја сочинуваа два авиони од типот „747-200Б“, кои беа во употреба уште од 1900 година. Директорот за комуникации на Белата куќа, Стивен Чунг, на социјалната мрежа Х објави фотографија од еден од старите авиони со порака: „Браво, добар и верен слуго. Последен лет“, потврдувајќи го неговото повлекување.

Овој „Боинг 747-8“ ќе служи како привремено превозно средство сè додека компанијата „Боинг“ не ги испорача двата долго најавувани авиони „ВЦ-25Б“ (VC-25B), наменети за долгорочна употреба, чија испорака беше повеќепати одложувана поради доцнење во производството.

Текстот (Фото+видео) „Летечка Бела куќа“: Трамп го претстави авионот што му го подари Катар е превземен од МАКФАКС.