Јанша: ЕУ мора да има еден претставник во преговорите за Украина

Словенечкиот премиер Јанез Јанша денес изјави дека Европската Унија треба да биде претставена во мировните преговори меѓу Украина и Русија од претседателот на Европскиот совет, Антонио Кошта, или од претставник официјално назначен од лидерите на ЕУ.

„Ние го имаме претседателот на Европскиот совет и освен ако не назначиме некој друг, тој е оној кој мора да ја претставува ЕУ. Меѓутоа, ако Европскиот совет назначи некој друг со целосен мандат да ја претставува Унијата, тогаш тоа е таа личност. Работата е многу едноставна“, рече Јанша по пристигнувањето на самитот на Европската политичка заедница во Даблин, пренесува СТА.

Тој нагласи дека ниедна земја-членка не може самостојно да ја претставува Европа или ЕУ ако не претседава со Советот на ЕУ или има експлицитен мандат од Европскиот совет.

„Можеме само да се обвинуваме себеси за овој хаос“, додаде словенечкиот премиер.

Прашањето за претставувањето и единствената позиција на ЕУ е меѓу главните теми на самитот во Даблин, на кој присуствува и претседателот на Украина, Володимир Зеленски.

Дебатата се интензивираше откако лидерите на Финска и Норвешка разговараа одделно по телефон со рускиот претседател Владимир Путин, што ја поттикна италијанската премиерка Џорџа Мелони да ја повика ЕУ да дејствува обединето и конечно да го дефинира својот преговарачки мандат.

Кошта ја поддржа позицијата на Мелони и потврди дека прашањето ќе се дискутира на неформалниот самит на ЕУ во петок, нагласувајќи дека институциите на Унијата мора да ги заштитат интересите на европскиот блок.

Дипломатската иницијатива следеше по преговорите во Абу Даби на почетокот на оваа недела, каде што европските претставници не учествуваа во трилатералните разговори меѓу претставниците на Украина, Русија и Соединетите Американски Држави.

Европската политичка заедница е основана во 2022 година на иницијатива на францускиот претседател Емануел Макрон и ги собира лидерите на земјите-членки на Европската Унија и други европски земји за да разговараат за политичката соработка, безбедноста и стабилноста на европскиот континент.

Тоа е неформален форум кој не донесува обврзувачки одлуки.

Лидерите на 48 земји учествуваат на самитот во Даблин, пренесува Танјуг.

Текстот Јанша: ЕУ мора да има еден претставник во преговорите за Украина е превземен од МАКФАКС.