Џо Бајден планира да ја посети границата со Мексико

Американскиот претседател Џо Бајден изјави дека планира да ја посети границата со Мексико „во одреден момент“ и дека неговата администрација работи на тоа потенцијалните мигранти да побараат азил во нивните матични земји, пренесуваат американските медиуми.

Бајден претходно се соочи со критики од републиканците за смена на некои тврди политики на неговиот претходник Доналд Трамп, за кои тврдат дека довеле до зголемен број мигранти на границата.

Неговата администрација се справува со растечката хуманитарна криза на границата, каде што мигрантите кои бегаат од насилство, природни катастрофи и економски тешкотии во Централна Америка, ја тестираат посветеноста на демократскиот претседател за похумана и миграциска политика.

Бајден рече дека некогаш ќе ја посети пограничната област, без да каже кога тоа може да биде.

На прашањето што може да се стори за да се убедат мигрантски семејства да престанат да доаѓаат преку границата, Бајден рече дека треба да се направи уште многу.

„Сега го правиме тоа, вклучително и проверка на повторно воспоставување на она што постоеше порано, а тоа е дека тие можат да бидат таму каде што се и да даваат аргументи од нивните матични земји. Владата засили со испраќање на пораки на англиски и шпански јазик за да ги убеди мигрантите да не доаѓаат во САД“, рече Бајден.

Тој планира да смести некои семејства на мигранти во хотели, според новата програма спроведена од непрофитни организации, објави Ројтерс, со цел да не ги сместува во притворските центри критикувани од демократите и здравствените експерти.