(Видео) Гутереш повика на солидарност: Сите да придонесеме за закрепнување во 2022 година

Во својата новогодишна порака, генералниот секретар на ОН, Антонио Гутереш повика 2022 година да биде година на закрепнување за луѓето, планетата и просперитетот.

„Да направиме заедно опоравувањето да биде наша одлука за 2022 година, да се обединиме околу решенија кои можат да им помогнат на сите луѓе, да продолжиме заедно со надеж за она што може да го постигнат нашите семејства“, рече Гутереш во новогодишната порака.

Тој изјави дека светот ја очекува 2022 година со надеж за иднината што е ставено на тест поради продлабочената сиромаштија, зголемената нееднаквост, нееднаквата распределба на вакцините против Ковид, неисполнетите климатски обврски, како и постојаните конфликти, поделби и дезинформации.

Според него, тоа не се само тестови на политиката, туку и тестови на моралот и реалниот живот.

„Ова се испитите што може да ги положи целото човештво ако се посветиме 2022 година да биде година на закрепнување за сите“, рече највисокиот претставник на ОН.

Гутереш детално објасни како закрепнувањето треба да се реализира на секој фронт.

Според него, пандемијата бара јасен план за вакцинација на секој човек, секаде во светот, додека за економско закрепнување потребно е побогатите земји да го поддржат светот во развој преку финансирање, инвестиции и олеснување на долговите.

Во меѓувреме, за да се опорави светот од недовербата и поделеноста, потребно е, како што тврди, нов акцент да се стави на науката, фактите и разумот.

Во исто време, закрепнувањето од конфликтот бара обновен дух на дијалог, компромис и помирување, додека закрепнувањето на нашата планета бара напори за решавање на климатските промени, кои се во согласност со обемот и итноста на кризата, вели Гутереш во новогодишната порака.