(Видео) Жестоки протести против мерките во Германија, повредени 13 полицајци

Според официјални податоци, 13 полицајци се повредени во ненајавените демонстрации против анти-ковид мерките во германскиот град Манхајм.

Во вечерните часови во центарот на Манхајм се собрала група од неколку стотици луѓе кои се противат на сегашните мерки, јавија германските медиуми.

Демонстрантите решиле да ги игнорираат актуелните забрани за собири и дадле отпор кога полицијата тргнала да го прекине нивниот марш.

Еден од полицајците поради повредите е префрлен во болница. Тринаесет лица се уапсени поради напад на полицијата, се вели во соопштението на полицијата во Манхајм.

Demonstranten verletzen in #Mannheim bei Protesten gegen Corona-Maßnahmen 13 Polizisten. Ein Beamter wurde bei den Auseinandersetzungen gestern Abend ins Krankenhaus eingeliefert. Die Polizei nahm 13 Tatverdächtige fest. pic.twitter.com/PhkQWzkhyO

— EHA News – Deutsch (@eha_deutsch) December 21, 2021

Уште 131 лице се пријавени за прекршување на законот за собири.

И во другите сојузни покраини на Германија, голем број луѓе уште еднаш демонстрираа против мерките за борба против пандемијата.

Според полицијата, во покраината Мекленбург-Западна Померанија вечерта околу 17.000 луѓе во 20 градови учествувале во пријавени и нерегистрирани настани.

Граѓани протестирале и во покраината Саксонија-Анхалт. Според полицијата, само во Магдебург на нерегистрирани протести се собрале 3.000 луѓе. Во неколку градови во Саксонија повторно се одржале нелегални протести, а неколку биле спречени од полицијата.