(Видео) Полицијата во Монтреал употреби солзавец и шок-бомби за да растури студентски протест, уапсени тројца

Полицијата во Монтреал употреби солзавец и шок-бомби за да растури студентски протест во центарот на градот, откако дел од демонстрантите почнале да фрлаат камења и бела течност кон полицајците. Во инцидентите се уапсени три лица, објави „Монтреал газет“.

Судирите избиле околу еден час по почетокот на протестниот марш, на кој, според проценките на организаторите, учествувале неколку илјади луѓе, а во најголемиот момент бројот на демонстранти достигнал околу 8.000.

Полицајците опремени за разбивање демонстрации интервенирале откако биле гаѓани со камења и други предмети. По улиците се проширил солзавец, а демонстрантите почнале да се разбегуваат.

Протестот се одржал на крајот од еднонеделниот студентски штрајк, организиран од Коалицијата за отпор и единство на студентските синдикати (CRUES). Студентите бараат поголеми средства за колеџите и универзитетите, реформа на системот за финансиска помош и надомест за задолжителната стручна пракса.

Незадоволството е насочено кон најавените мерки за штедење и можните кратења на средствата за образование од страна на новата влада на Квебек, предводена од Партијата на Квебек.

Министерката за високо образование Елси Лефевр и министерот за внатрешна безбедност Ги Лапоант Помладиот го осудија насилството и вандализмот, но истовремено порачаа дека студентите имаат право на мирни протести.

Лефевр оцени дека студентското движење заслужува да биде сослушано и почитувано, но нагласи дека мора да се направи разлика меѓу мирното изразување незадоволство и насилството.

Студентите предупредуваат дека растечките трошоци за живот и недоволното финансирање на образовните установи им го отежнуваат студирањето. Дел од нив посочуваат и дека задолжителната стручна пракса, која во некои програми трае до 900 часа, не се плаќа.

Организаторите размислуваат за проширување на протестите и започнување неограничен генерален штрајк во текот на зимата 2027 година. Студентските здруженија на 21 ноември треба да разговараат за предлогот, по што секое од нив ќе одлучи дали ќе се приклучи.

Демонстрациите потсетија на студентското движење од 2012 година, кога во Квебек со месеци се протестираше против зголемувањето на школарините.

Текстот (Видео) Полицијата во Монтреал употреби солзавец и шок-бомби за да растури студентски протест, уапсени тројца е превземен од МАКФАКС.