(Видео) Ѕвездите ги напуштаат домовите поради пожарот во Малибу: огнот ја пустоши областа на богатите во Градот на ангелите

Поради големиот пожар, кој бргу се шири во Малибу, богата енклава во Лос Анџелес, на многубројни ѕвезди им е наредено да ги евакуираат своите домови.

Меѓу нив се актерот Дик ван Дајк и пејачката Шер, објави Би-би-си, а свој имот на оваа област имаат и актерите Патрик Демпси, Мел Гибсон, Џулија Робертс, како и пејачите Бијонсе, Лејди Гага и Џеј Зи.

Според властите, пожарот избувнал во кањонот Малибу во понеделникот вечерта околу 22.50 часот по локално време, а веќе изгореле десетина куќи. Беше наредена задолжителна евакуација за поголемиот дел од Малибу.

Засега нема повредени во пожарот, но сè уште не е ставен под контрола. Сè уште не е јасно што го предизвикало пожарот, но регионот бил под предупредување и било издадено црвено знаме, што значи дека условите се погодни за екстремни пожари.

Scenes from the #franklinfire on the Pepperdine campus by @TimHortonphoto pic.twitter.com/BvOdu4UvY1

— Cece Woods (@ceceswoods) December 10, 2024

Според последниот извештај на Калифорниското одделение за шумарство и заштита од пожари (Cal Fire), досега изгореле повеќе од 3.000 хектари земја.

Малибу е популарно место за познати личности. Ван Дик беше меѓу ѕвездите што мораа да ги напуштат своите домови, што тој го потврди со објава на „Фејсбук“.

Актерот од „Мери Попинс“, кој во петокот наполни 99 години, рече дека тој и неговата сопруга Арлин безбедно го напуштиле домот со своите миленици, освен мачката по име Бобо, која е исчезната.

„Се молиме да биде во ред и нашата заедница во Сера Ритрит да ги преживее овие страшни пожари“, рече тој.

Очевидци за KABC-TV изјавија дека соседната куќа до актерот била зафатена од пламен, но дека куќата на Ван Дик останала недопрена. Поради пожарот, областа морала да ја напушти и пејачката Шер, пишува „Њујорк тајмс“.

Училиштата во областа беа затворени, патиштата беа блокирани, а струјата беше исклучена за да се спречи засилување на пожарот. Во меѓувреме се отворени центри за евакуација на жителите и животните. Повеќе од 5.000 луѓе беа во зоната на евакуација.

Снабдувањето со електрична енергија на голем дел од кампусот и околината се очекува да остане во прекин во догледна иднина, соопшти универзитетската управа.

Калифорнија е држава подложна на шумски пожари, а опожарените области се зголемија петпати помеѓу 1996 и 2020 година во споредба со претходниот период од 24 години. Научниците ова го припишуваат на климатските промени, иако не сите шумски пожари може автоматски да се поврзат директно со оваа причина.

Текстот (Видео) Ѕвездите ги напуштаат домовите поради пожарот во Малибу: огнот ја пустоши областа на богатите во Градот на ангелите е превземен од МАКФАКС.