(Видео) „Ќе го заштитиме своето небо“: Украина развива нов систем за противракетна одбрана

Украинската технолошка и одбранбена компанија Fire Point успешно го изврши тестирањето на балистичкиот проектил FP-7. Станува збор за ракета која ќе послужи како технолошка основа за развој на нов противбалистички пресретнувач наречен FREYJA.

Овој амбициозен домашен проект треба во блиска иднина да ѝ овозможи на Украина целосно самостојно и независно да го заштитува својот воздушен простор од најтешките балистички закани, јавува украинската национална новинска агенција UNN.

Видео од успешно лансирање прва ја објави техничката директорка на компанијата, Ирина Терех.

$bp(“TargetVideo_80497108”, {“id”:”45264″,”width”:”420″,”height”:”560″,”video”:”2639070″,”autoplay”:0,”shared”:true});

„Во изминативе денови спроведовме исклучително важно тестирање: целосно контролирано, маневрирачко летање на ракетата FP-7.X, која ќе ја сочинува основата на нашиот иден противбалистички пресретнувач FREYJA. Колку и да звучи оваа цел денес нереално и премногу амбициозно, ги вложуваме сите можни и невозможни напори за таа што побрзо да стане реалност и Украина самостојно да може да го затвори своето небо“, напиша Терех на својот Инстаграм профил.

Техничката директорка на Fire Point упати и силна критичка порака насочена кон долгорочните системски пропусти во одбранбената стратегија и образованието. Според неа, државите многу поретко ги губат војните на бојното поле отколку што ги губат во институциите, лабораториите и производните погони — и тоа цели десет години пред самите конфликти воопшто да започнат.

„Кога една земја со години хронично недоволно го финансира инженерското образование, кога ги кратат буџетите за научни истражувања, губи производствени капацитети или се навикнува слепо да се потпира на туѓа технологија, таа постепено создава огромен стратешки дефицит. Тој недостаток станува видлив дури кога ќе започне војната“, предупреди Терех.

Таа истакна дека Украина сега мора по секоја цена да излезе од, како што ја нарече, „јамата на смртта“, да ги извлече поуките од сопствените историски грешки и да продолжи напред. Додаде дека компанијата одлучила сама да ја преземе иницијативата, без да чека државни политики или буџетски одобрувања.

Секој успешен тест на новата ракета, рече таа, е голем чекор кон целосен технолошки суверенитет на државата — односно способноста Украинците самите да произведуваат критични воени технологии во своите граници.

Компанијата Fire Point се профилира како еден од клучните актери во модернизацијата на украинската одбранбена индустрија. Создадена како одговор на итната потреба за домашни технолошки решенија, таа се специјализира за развој на напредни беспилотни системи, ракети и софтвер за управување со огнот на бојното поле.

Текстот (Видео) „Ќе го заштитиме своето небо“: Украина развива нов систем за противракетна одбрана е превземен од МАКФАКС.