Зеленски за САД: Губиме силен партнер, но не по наша вина

Украинскиот претседател, Володимир Зеленски, изјави дека се чувствува предаден од потезите на американскиот претседател Доналд Трамп во однос на Русија. Во интервју со британскиот водител Пирс Морган, тој призна дека Украина губи силен сојузник и рече дека Трамп ја избира погрешната страна, пренесува „Киев Индипендент“ (The Kyiv Independent).

Морган праша дали се чувствува предаден по договорот на Трамп со рускиот претседател Владимир Путин во врска со дизелот, ублажувањето на санкциите и продолжувањето на руските напади врз украинската енергетска инфраструктура. „Всушност, да. Искрено, само меѓу нас. Но, мислам дека е малку покомплицирано од моите емоции или чувства. Тоа не зависи од мене. Нашата земја мора да опстане“, одговори Зеленски.

На прашањето како реагирал кога дознал за договорот на Трамп со Путин, постигнат 21 ден откако беа воведени нови санкции против Русија, Зеленски рече дека таквиот развој на настаните го разочарал. „Жалосно е што губиме, што губиме силен партнер. Тоа е моето мислење“, рече украинскиот претседател.

Морган потоа директно го праша дали смета дека Украина ја губи Америка. Зеленски одговори потврдно и објасни зошто неговата земја не може да ги прифати американските барања што би го загрозиле нејзиниот опстанок.

„Да, но не по наша вина. Не смееме да бидеме слаби бидејќи во спротивно не можеме да опстанеме. Ние не ја продаваме нашата земја. Видете, луѓе, ова за нас не е бизнис. Ова е нашиот живот, ова е нашата земја. Ова е нашето тело, нашиот дом, нашите деца. Ова е исклучително важно за нас“, рече тој.

„Затоа е болно кога претседателот Трамп избира една страна, а не нашата. Немаме ништо против тоа тој да биде во средината. Но, ако си во средината, мора да останеш во средината, а не да преминеш на погрешната страна“, продолжи Зеленски.

Во исто време, украинскиот претседател упати критики и кон луѓето од опкружувањето на Трамп, сметајќи дека тие го насочуваат американскиот претседател кон одлуки што ѝ користат на Русија.

„Мислам дека неговите советници грешат. Не знам кој го турка кон погрешната страна. Тоа не е вистинската страна на историјата“, рече тој.

На 9 октомври, Трамп објави договор што би овозможил продажба на руски дизел на светскиот пазар, и покрај претходно воведените санкции. Во последните денови, американскиот претседател, исто така, го засили притисокот врз Украина да престане со нападите врз руските нафтени постројки, тврдејќи дека таквите напади придонесуваат за пораст на цените на горивото.

Трамп, исто така, изјави дека некој друг треба да го замени Зеленски на чело на Украина. Според претходни медиумски извештаи, американската администрација размислувала и за ограничување на споделувањето разузнавачки податоци и испораката на муниција со цел да изврши притисок врз Киев.

Во меѓувреме, Трамп објави дека Русија и Украина се договориле за енергетско примирје; сепак, руските сили продолжија да ја напаѓаат украинската енергетска инфраструктура. Во текот на ноќта кон 14 октомври, тие извршија нов голем напад со ракети и беспилотни летала, гаѓајќи енергетски објекти во регионите на Киев и Харков.

На прашањето за продолжените напади, портпаролот на Кремљ, Дмитриј Песков, одговори дека условите за евентуалното енергетско примирје сè уште не се дефинирани. Тој наведе дека работата на предлогот е во тек.

Зеленски исто така ги коментираше ограничувањата на пристапот до сателитскиот интернет „Старлинк“ (Starlink), кој украинските сили го користат за комуникација и воени операции. Тој ја нарече одлуката „голема грешка“, а на 14 октомври Украина потврди дека ограничувањата на пристапот до терминалите ги попречуваат нејзините борбени операции.

Текстот Зеленски за САД: Губиме силен партнер, но не по наша вина е превземен од МАКФАКС.