Ким Џонг-ун надгледуваше пробно истрелување на нов тип проектили

Севернокорејскиот лидер Ким Џонг-ун го следел пробното истрелување на нов тип тактички водено оружје чија цел е зајакнување на нуклеарните капацитети на земјата, објави севернокорејската државна новинска агенција КЦНА.

Веста доаѓа во услови на знаци, според јужнокорејски и американски официјални лица, дека Северна Кореја наскоро може да продолжи со нуклеарно тестирање дури и откако Ким минатиот месец го укина самонаметнатиот мораториум за тестирање на интерконтинентални балистички ракети.

Јужнокорејската војска соопшти дека забележала два проектили истрелани од источниот брег на Северна Кореја кон морето доцна во саботата, летајќи околу 110 километри со максимално растојание од 25 километри од земјата.

„Составот на новиот тип на систем за тактичко оружје (…) е од големо значење за значително подобрување на огнената моќ на артилериските единици со долг дострел и подобрување на ефикасноста на тактичките нуклеарни бомби“, пишува КЦНА.

Агенцијата не соопшти кога е извршено тестирањето, ниту пак даде детали за проектилот. Откако го надгледуваше тестот, Ким „даде важни инструкции за понатамошно градење на одбранбените капацитети на земјата и нуклеарните борбени сили“, објави КЦНА.