Навални со повик до Русите: Не се плашете, излезете на протести

Лидерот на руската опозиција во притвор, Алексеј Навални ги повика приврзаниците и во наредниот викенд да излезат на протестите на национално ниво. Во писмото објавено на неговата веб-страница, откако судот ја одби жалбата против неговото апсење, Навални ги повика Русите да го тргнат стравот и да организираат нови протести.

„Излези, не се плаши од ништо. Никој не сака да живее во земја во која владее тиранијата и корупцијата. Мнозинството е на наша страна“, вели Навални.

Протестите се најавуваат за на 31 јануари, по демонстрациите во десетици градови во минатиот викенд на кои излегоа стотици илјади луѓе и покрај бруталната полициска акција. Во демонстрациите полицијата приведе околу 4.000 лица.