Нови мерки во Британија: Контактите на заразените ќе се тестираат еднаш дневно

Британскиот премиер Борис Џонсон во средата рече дека Обединетото Кралство ги заострува ограничувањата за да го спречи ширењето на омикрон, така што работата од дома и пропусниците за коронавирус за некои поголеми собири ќе бидат повторно воведени во понеделник.

„Станува појасно дека омикрон се шири многу побрзо од делтата порано“, бидејќи досега се пријавени 568 случаи на коронавирус во Обединетото Кралство, а реалната бројка е „сигурно многу поголема“, рече Џонсон на прес-конференција.

„Бројот на заразени со омикрон се удвојува на секои 2 до 3 дена“

Истакнувајќи дека бројот на заразени со омикрон во земјата се чини дека се удвојува на секои два до три дена и не сакајќи да шпекулира за сериозноста на симптомите предизвикани од овој сој, конзервативниот лидер истакна дека „таков експоненцијален раст може да поттикне големо зголемување на хоспитализации„.

„Затоа, преминот кон план Б“ што се однесува до ограничувањата во Англија „е пропорционален и разумен одговор“ додека не се забрза кампањата за ревакцинација, додаде тој.

Владата затоа бара од вработените да работат од дома уште во понеделник „ако е можно“.

Секојдневното тестирање ќе биде задолжително за секој што ќе дојде во контакт со заразено лице.

Ќе се воведат дневни тестови наместо самоизолација за да се намалат нарушувањата во секојдневниот живот, рече Џонсон.

„Но, најважното нешто што секој од нас може да го направи е да се вакцинира. Клучот е да се добие таа засилена доза веднаш штом ќе дојде редот“, рече Џонсон, додавајќи дека вакцинацијата треба да се случи побрзо, пренесува Би-Би-Си.

Велика Британија, меѓу најтешко погодените европски земји со скоро 146.000 смртни случаи од почетокот на пандемијата на Ковид-19, се врати на рестриктивните мерки за да го спречи ширењето на омикрон, како што се ограничувањата за патување, носењето маски во продавниците и јавниот превоз.