Нов земјотрес со јачина од 6,1 степен го погоди јужниот дел на Панама

Јужниот дел на Панама синоќа беше погоден од нов земјотрес со јачина од 6,1 степен, а според првичните информации, нема извештаи за жртви или материјална штета.

Американскиот геолошки институт (USGS) соопшти дека потресот бил регистриран околу 18:20 часот по локално време, на длабочина од 10 километри, со епицентар на 18 километри западно од градот Рио Гранде, пренесува АП.

Серија земјотреси на југот на земјата
Новите потреси уследија откако во петокот попладне јужниот дел на Панама беше погоден од два силни земјотреса со јачина од 7,7 и 6,6 степени, проследени со серија последователни потреси. Првиот земјотрес имаше епицентар во провинцијата Херера, на длабочина од десет километри, а се почувствува и во соседна Колумбија. Поради тресењето на тлото, беа евакуирани бројни објекти, а дел од жителите ноќта ја поминаа на отворено.

Панамските власти во саботата прогласија вонредна состојба. Повредени беа дваесет и седум лица, а штети беа пријавени во сите десет провинции на земјата, како и на две територии на автохтоните заедници. Според тогашните податоци на службите за цивилна заштита, оштетени биле околу 420 куќи, сличен број училишта, седум хотели, најмалку 13 цркви и девет моста. Властите во тоа време не пријавија жртви поврзани со земјотресите.

Централните провинции Верагвас, Ерера, Кокле и Лос Сантос претрпеа особено тешки последици. На некои локации се урнаа згради, а одроните и оштетените патишта оставија одредени заедници отсечени. На островот Исла Кањас во Тихиот Океан, околу 300 луѓе беа евакуирани поради покачувањето на нивото на морето и силните бранови.

Земјотресите исто така привремено ја прекинаа работата на меѓународниот аеродром „Токумен“ во главниот град, предизвикувајќи пореметувања во воздушниот сообраќај. Аеродромот повторно беше отворен неколку часа подоцна.

Текстот Нов земјотрес со јачина од 6,1 степен го погоди јужниот дел на Панама е превземен од МАКФАКС.