Орбан: Доколку ЕУ го спроведе својот план, Унгарија ќе доживее армагедон

Виктор Орбан тврди дека е уценет од Брисел да одобри пакет помош од 50 милијарди евра за Украина, на што евроскептичниот премиер на Унгарија жестоко се спротивстави. Минатиот викенд беше објавено дека во документ на неименуван функционер на Советот на ЕУ се наведени мерките насочени кон унгарската економија, кои ќе бидат спроведени доколку Орбан не го одобри пакетот помош за Украина.

За пакетот помош ќе се разговара на самитот на водачите на ЕУ подоцна оваа недела. Во интервјуто објавено вчера за францускиот неделник „Ле Поинт“, Орбан рече дека планот е „како прирачник за уцена, што ќе ја стави Унгарија под „голема финансиска блокада“.

„Тогаш Унгарија би доживеала Армагедон“, рече унгарскиот премиер, пренесува „Политико“. Тој изјави дека „не се сомнева“ оти документот за кој пишува „Фајненшл тајмс“ е автентичен.

„Познавајќи го Брисел, тие се способни за тоа“, истакна тој. Орбан се вклучи во тензични преговори за извлекување отстапки од остатокот од блокот во замена за поддршка за пакетот помош за Украина. Тој беше единствениот европски лидер што одби да го поддржи пакетот помош на самитот во декември.

Предложениот финансиски пакет ќе црпи пари од буџетот на Европската Унија, што значи дека бара едногласно одобрување од лидерите на ЕУ, вклучително и Унгарија. Оттогаш Унгарија понуди да го подели финансирањето на годишни транши, што ефективно ќе ѝ даде на Будимпешта шанса да го блокира испраќањето на помошта за Украина секоја година.

Тешката тактика на Орбан ги иритира бриселските власти, кои можеби размислуваат да му го одземат правото на глас на унгарскиот лидер. Сепак, унгарскиот лидер не се откажува. „Ништо не се смени“ во позицијата на Унгарија на оваа тема, нагласи Орбан, кој е се поизолиран меѓу лидерите на ЕУ поради неговото противење да ја поддржи Украина.

„Унгарија како суверена држава се спротивставува на оваа промена на буџетот. Тие се обидуваат да нè убедат, потоа вршат притисок и уценување за да не принудат да им се придружиме. Многу е тешко да се биде сам во ова семејство“, заклучи тој.

Текстот Орбан: Доколку ЕУ го спроведе својот план, Унгарија ќе доживее армагедон е превземен од МАКФАКС.