Пакистанскиот премиер повика на воздржаност: Мирот е на дофат, да му дадеме уште една шанса

Пакистанскиот премиер Шехбаз Шариф ги повика сите страни на воздржаност со цел да се зачува мирот, особено во момент кога конечната цел е речиси на дофат, порача тој во објава на социјалните мрежи.

Претходно, иранската војска соопшти дека ќе ги прекине нападите врз Израел, но предупреди дека ќе одговори уште посилно доколку продолжат нападите врз Либан. Израелските медиуми, пак, објавија дека Израел ќе ги запре нападите врз Иран „на барање на Трамп“.

Во објава на платформата Икс, Шариф напиша: „Неодамнешната ескалација на насилството на Блискиот Исток е остар потсетник на опасностите што ги носи кревкото примирје и на неподносливите последици до кои може да доведе неговото нарушување.“

Тој додаде: „Додека сериозно и посветено работиме заедно со нашите браќа и партнери на изнаоѓање мирно дипломатско решение за конфликтот, и особено во момент кога конечната цел е речиси постигната, искрено ги повикуваме сите страни на воздржаност и да му дадат уште една шанса на мирот.“

Пакистан во изминатиот период беше еден од клучните посредници меѓу Иран и Соединетите Американски Држави.

Една рунда разговори меѓу иранската и американската делегација, со посредство на Пакистан, беше одржана на 11 и 12 април во Исламабад, а подоцна беа подготвувани и дополнителни преговори, кои сепак не беа реализирани.

Фото: depositphotos

Текстот Пакистанскиот премиер повика на воздржаност: Мирот е на дофат, да му дадеме уште една шанса е превземен од МАКФАКС.