Палестина со осуда за Амбасадата: Косово, ова нема да ви помине неказнето

Палестинскиот амбасадор во Белград, Мохамед Набхан, остро го критикуваше Косово за отворањето на амбасадата во Ерусалим.

Набхан рече дека Косово, кое, како што вели, сè уште не е држава, започна да го крши меѓународното право на штета на другите народи, не само на Балканот, туку и на Блискиот исток, велејќи дека тоа нема да остане неказнето.

По вчерашното официјално отворање на амбасадата на Приштина во Ерусалим, Набхан за „Косово онлајн“ изјави дека многу внимателно ги следеле чекорите на Косово во врска со отворањето на дипломатска мисија во Ерусалим и дека постојано биле во контакт со Палестина и дека ќе бидат преземени чекори на ниво на Арапската лига и исламската соработка, што, како што тврди, на Приштина нема да ѝ се допадне.

„Косово не е член на ниту една од овие организации, но многу членки го признаа таканареченото Косово и ние ќе ги замолиме тие земји сега да ги разгледаат нивните признанија“, нагласи Набхан.

Палестинскиот амбасадор посочи дека со отворање амбасада во Ерусалим, Приштина ги крши правата на палестинскиот народ кон својата држава и главен град, но и меѓународното право, затоа што, како што вели, Ерусалим е окупиран од Израел од 1967 година. Тој вели дека за некоја земја да стане членка на ООН мора да почитува меѓународното право.