Пентагон бара 80 милијарди долари за трошоците за војната во Иран

На Министерството за одбрана на САД му се потребни 80 милијарди долари за да ги покрие трошоците за војната со Иран, како и други ставки кои не се поврзани со војната. Заменик-министерот за одбрана, Стивен Фајнберг, им рече на пратениците во телефонски разговор оваа недела, објави „Волстрит журнал“.

Целосното барање за дополнително финансирање, кое вклучува пари за Пентагон, како и цивилни приоритети како што се земјоделска помош и помош при катастрофи, би можело да им биде презентирано на пратениците во наредните денови, објави весникот. „Ројтерс“ не можеше независно да ги потврди извештаите, а Белата куќа и Пентагон не беа веднаш достапни за коментар.

Високи трошоци
Според првата официјална проценка, дадена на „Ројтерс“ од функционер на Пентагон во април, војната со Иран досега чинела околу 25 милијарди долари. Сепак, вистинската цена на конфликтот, кој Трамп и Израел го започнаа на 28 февруари, останува отворено прашање во Конгресот. Првичното барање за дополнително финансирање од 200 милијарди долари наиде на силен отпор од пратениците.

Директорот за буџет на Белата куќа, Расел Воут, сведочеше пред Комитетот за буџет на Претставничкиот дом во април дека нема проценка за трошоците за војната. Тој го бранеше барањето на Трамп за годишен воен буџет од 1,5 билиони долари.

Предложениот буџет ги одразува приоритетите на републиканците пред ноемвриските избори, на кои партијата се обидува да ја задржи контролата врз Конгресот. Во исто време, тие се соочуваат со растечка загриженост кај гласачите за зголемувањето на трошоците за живот, високите цени на енергијата и финансискиот товар од војната со Иран.

Текстот Пентагон бара 80 милијарди долари за трошоците за војната во Иран е превземен од МАКФАКС.