Песков: Руските служби открија подготовки за напади врз гасоводи

Портпаролот на Кремљ, Дмитриј Песков, денес изјави дека руските разузнавачки служби имаат информации за можни планови на Киев за саботажа на гасоводите „Син поток“ и „Турски поток“.

„Нашите специјални служби ги имаат овие информации. Тие ги евидентираат обидите на режимот во Киев да се подготви за нови акти на саботажа“, им рече Песков на новинарите, одговарајќи на прашање за претходната изјава на рускиот претседател Владимир Путин, кој на состанокот на колегиумот на ФСБ изјави дека се добиени информации за можни планови за напад врз гореспоменатите гасоводи, објави Риа Новости.

Зборувајќи за политичкиот курс на Украина, Песков оцени дека „досега нема значајни промени во ставот на режимот во Киев“.

Коментирајќи ја безбедносната состојба во Јужна Азија, Песков рече дека директните воени конфликти меѓу Пакистан и Авганистан „не се добар знак“ и изрази надеж дека тие ќе завршат што е можно поскоро.

„Секако, директните воени конфликти што се случија не се добар знак. Затоа, се надеваме дека тие ќе престанат што е можно поскоро“, рече Песков.

Тој додаде дека Москва внимателно го следи развојот на настаните.

Песков, исто така, оцени дека, имајќи го предвид расположението во одредени европски земји, обидите за „легализирање на кражбата“ на руски имот на Запад ќе продолжат.

„Со оглед на преовладувачкото расположение меѓу европските земји, јасно е дека нивните обиди да ја протуркаат и легитимираат оваа кражба ќе продолжат“, рече Песков, реагирајќи на претходната изјава на германскиот министер за надворешни работи Јохан Вадефул, кој изјави дека прашањето за користење на замрзнатите руски средства за поддршка на Украина во моментов не е на агендата на Европската унија.

Зборувајќи за билатералните односи, портпаролот на Кремљ потврди дека се подготвува средба меѓу Путин и премиерот на Пакистан, Шехбаз Шариф, кој треба да ја посети Русија од 3 до 5 март, пренесува Танјуг.

Текстот Песков: Руските служби открија подготовки за напади врз гасоводи е превземен од МАКФАКС.