Покрај гробот на Навални и денеска се собираат луѓе и оставаат цвеќиња

Еден ден по погребот на Алексеј Навални, неговите приврзаници продолжуваат да го оплакуваат противникот на Кремљ на гробиштата. Руските медиуми јавуваат дека полицијата дозволува пристап до гробот и цвеќе.

Снимката од гробот покажува море од цвеќиња и венци, руски православен крст и фотографија од насмеаниот Навални.

Властите објавија дека тој починал на 16 февруари во затвор во арктичкиот регион Јамал, кога му се слошило по куса прошетка. По вчерашниот погреб, неговиот тим уште еднаш нагласи дека опозицијата, побегната во странство, ќе ја продолжи борбата против корупцијата на руските власти и политичкиот апарат на претседателот Владимир Путин.

На денот на погребот се одржаа настани низ целата земја, со десетици апсења. Платформата OVD-Info утринава објави дека имало повеќе од стотина апсења во дваесет градови, меѓу кои 20 само во Новосибирск.

Вчера илјадници луѓе се собраа на погребот во Москва. Многумина од нив извикуваа „Путин е убиец!“ и „Русија без Путин“. Роднини, поддржувачи и активисти за човекови права го обвинуваат Путин дека го убил својот политички противник во затвор. Навални веќе бил ослабен поради претходното труење, а властите тврдат дека колабирал во затворскиот двор и дека обидите да го оживеат не успеале.

Кремљ ја отфрла одговорноста за неговата смрт, пред изборите одржани од 15 до 17 март, на кои се очекува Путин да го добие петтиот мандат на чело на Русија.

Текстот Покрај гробот на Навални и денеска се собираат луѓе и оставаат цвеќиња е превземен од МАКФАКС.