„Политико“: Путин го поткопува Мерц и ја зајакнува германската крајна десница

Кремљ ги засили напорите за забрзување на падот на германскиот канцелар Фридрих Мерц, чија популарност во земјата опаѓа, и за зајакнување на растечките проруски сили на германската крајна десница, пишува бриселскиот портал „Политико“.

Рускиот претседател Владимир Путин се обидува да го поткопа Мерц, еден од најголемите поддржувачи на Украина и затоа е еден од неговите главни стратешки противници, и го удира кога е најслаб, со кампањи за влијание и хибридни напади, според порталот.

Економијата на Германија се сопнува, нејзината центристичка владејачка коалиција е ослабена, а анкетите покажуваат дека крајно десничарската Алтернатива за Германија (АфД) води важни избори во две источногермански покраини, каде што се очекуваат нејзини историски победи и каде што би можела да формира влада за прв пат.

Крис Шуленбург, пратеник на Христијанско-демократската унија (ЦДУ) на Мерц во покраината Саксонија-Анхалт, една од двете источногермански покраини каде што изборите ќе се одржат во септември, рече дека Русија „бара партнери во Европа што може да ги користи за свои цели“.

„Целта, секако, е АфД да дојде на власт во блиска иднина – или на покраинските избори или на следните федерални избори. Ова би ѝ дало на Русија стратешки партнер во Германија, а со тоа и упориште во Европа“, рече Шуленбург.

Во последните недели, Путин го засили притисокот врз Мерц. Рускиот лидер вршеше притисок и отворено – со суспендирање на испораката на казахстанска нафта до Источна Германија преку руски гасовод, и посуптилно – со обид да го подели германското јавно мислење предлагајќи го поранешниот канцелар Герхард Шредер, кој е симпатизер на Кремљ, како потенцијален преговарач во мировниот процес за Украина, според „Политико“.

Дополнително, еден од советниците на Путин ги покани политичарите од АфД да присуствуваат на годишниот економски форум во Санкт Петербург, организиран од рускиот претседател.

Стратегијата на Путин, оценува бриселскиот портал, е да ги искористи реалните и растечки политички слабости на Мерц, особено кога станува збор за германското незадоволство од економијата, и да ги заостри поделбите околу германската воена поддршка за Украина.

Москва ги претставува конзервативците на Мерц како неодговорни военоподбуцнувачи поради нивната поддршка за Украина и поради нивното одбивање да преговараат со Путин за завршување на војната, истакнува „Политико“.

Многу од овие наративи резонираат особено силно во областа на поранешна Источна Германија, каде што јавноста е посочувствителна кон Русија отколку во другите делови од земјата.

Аналитичарите очекуваат мрежите поддржани од Кремљ да ги интензивираат кампањите за влијание преку интернет како што се приближуваат регионалните избори во септември.

Штефан Мајстер, експерт за Русија во Германскиот совет за надворешни односи, рече дека Кремљ ги гледа изборите во источна Германија како можност „масовно да ја ослабне Германија, а особено сегашната влада“.

„Ако има нешто во што Русите се добри, тоа е идентификување на слабостите на нивните противници и нивно искористување. А Источна Германија е, така да се каже, една од најранливите точки за федералната влада и за способноста на Германија да дејствува, бидејќи во суштина е влезна точка за АфД да дојде на власт“, ​​рече Мајстер.

Кремљ тврди дека Мерц и нејзината коалиција се пречка за мирот во Европа и просперитетот во Германија, и дека решението е германска крајно десничарска влада.

Ова помага да се објасни зошто Путин се обидува да се претстави како лидер кој е подготвен да соработува со Германија, но само ако во Берлин има влада која е подготвена да соработува со него.

Лидерката на АфД, Алис Вајдел, оваа недела посочи дека заканата за Германија е Украина, а не Русија, и рече дека нејзината партија е подготвена да разговара за мир со Путин.

„Веруваме дека водењето на војната од страна на Украина е апсолутно катастрофално и претставува огромен безбедносен ризик за Германија. Германската влада, која ќе биде предводена од АфД, ќе се залага за мир со Русија, за помирување и дијалог“, рече Вајдел.

Текстот „Политико“: Путин го поткопува Мерц и ја зајакнува германската крајна десница е превземен од МАКФАКС.