Првичен извештај: Пиротехниката во затворен простор причина за пожарот во барот во Кран-Монтана во кој загинаа 40 луѓе

Почетниот извештај за разорниот пожар во бар во Кран-Монтана, во кантонот Вале, во кој загинаа 40 лица, а повеќе од 100 беа повредени, укажува дека причина за трагедијата била употреба на огномет во затворен простор.

Според наодите на истражителите, во урнатините на барот е пронајдена голема количина пиротехнички средства. Во извештајот се наведува дека биле откриени 25 огнени фонтани, а при дополнителна претрага биле пронајдени уште околу 100 неактивирани фонтани, како и нелегални петарди.

„Овие фонтани содржат пиротехничка смеса која создава искри и пламен и се дизајнирани да произведуваат искри и пламен со акустичен ефект“, се наведува во извештајот, кој го пренесе Билд.

Истражителите се убедени дека пожарот избувнал кога огномет поставен врз шишиња шампањ бил активиран внатре во објектот. Пиротехничкиот експерт Ерих Фрај предупредува дека комбинацијата од огномет и стара, кршлива изолациска пена е исклучително опасна, бидејќи материјалот лесно се пали и овозможува брзо ширење на огнот и густ чад.

Извештајот содржи и потресни сведоштва на преживеани. Еден 19-годишен гостин изјавил дека, обидувајќи се да се пробие низ гужвата кон скалите, бил принуден да ползи преку телата на други повредени за да се спаси.

Истрагата за одговорноста за трагедијата во Кран-Монтана е во тек, а надлежните служби најавуваат дополнителна анализа на безбедносните пропусти и употребата на пиротехника во угостителски објекти.

Текстот Првичен извештај: Пиротехниката во затворен простор причина за пожарот во барот во Кран-Монтана во кој загинаа 40 луѓе е превземен од МАКФАКС.