Пристигна рускиот одговор на планот на Трамп

Кремљ соопшти дека Русија сè уште не добила ништо официјално од Соединетите Американски Држави за мировниот план на САД за Украина од 28 точки, но дека е подготвена за преговори.

Вашингтон му го претстави на Киев планот за кој украинските претставници тврдат дека го проучуваат.

Портпаролот на Кремљ, Дмитриј Песков, изјави дека Москва и Вашингтон сè уште не ги дискутираат предлозите детално, но дека се водат контакти.

„Постојат одредени идеи од американска страна, но во моментов не се дискутира ништо суштинско. Ние сме целосно отворени, ја одржуваме нашата отвореност за мировни разговори“, им рече Песков на новинарите.

Тој, исто така, истакна дека руското напредување на бојното поле го стеснува просторот за дејствување на украинскиот претседател Володимир Зеленски.

„Ефикасноста на руските вооружени сили треба да го убеди Зеленски и неговиот режим дека е подобро да се преговара и да се направи тоа сега. Подобро е да се направи тоа сега, отколку подоцна. Неговиот простор за донесување одлуки се намалува бидејќи губи територија за време на офанзивните акции на руските вооружени сили“, рече Песков.

Според него, продолжувањето на војната е „бесмислено и опасно“ за Украина.

„Украинскиот режим мора да донесе одговорна одлука. Направете го тоа сега и преземете одговорност“, додаде тој.

Зеленски потврди дека го добил американскиот план, но не коментираше директно за неговата содржина. Тој објави преку Телеграм дека Украина е „подготвена за конструктивна, искрена и брза работа“.

Текстот Пристигна рускиот одговор на планот на Трамп е превземен од МАКФАКС.