Реакција од Балтикот на руската закана од нуклеарно оружје: Тоа е глупост

Премиерката на Литванија Ингрида Шимоните ја коментираше последната закана од Дмитриј Медведев, кој рече дека веќе не може да се зборува за Балтикот без нуклеарно оружје во случај Шведска и Финска навистина да влезат во НАТО, што е сè поверојатно.

– Тоа што Русија се заканува не е ништо ново. Калининград (руска енклава на Балтикот) е екстремно милитаризирана зона и е така со години и се наоѓа во балтичкиот регион – изјави Симоните.

Премиерката на Литванија вели дека силно го поддржува влезот на Шведска и Финска во НАТО.

-Верувам дека влезот на овие земји во Северноатлантската алијанса значително би го зајакнал НАТО, но и нивото на безбедност во тие земји. Мислам дека балтичките земји ќе ја поздрават таа одлука штом ќе биде објавена – рече таа.

За новата руска закана зборуваше и литванскиот министер за одбрана Арвидас Анусаускас, кој рече дека е „бесмислена“. Тој рече дека руското нуклеарно оружје постоело во Калининград и пред руската инвазија на Украина.

– Новата руска закана звучи прилично чудно со оглед на тоа што знаеме дека Русите имаа нуклеарно оружје на 100 километри од границата со Литванија и пред украинската криза. Русите одамна имаат нуклеарно оружје во Калининград. Меѓународната заедница и сите земји во регионот се совршено свесни за тоа. Русите го користат како закана – изјави Анушаускас.

Руската енклава Калининград на брегот на Балтичкото Море се наоѓа меѓу Литванија и Полска, две членки на НАТО.