Руските напади во Украина се корекција на историјата, вели сирискиот претседател

Сирискиот претседател Башар ал Асад во телефонски разговор со неговиот руски колега Владимир Путин ја поздрави руската инвазија на Украина, оценувајќи ја како „корекција на историјата“.

„Претседателот Асад истакна дека она што се случува денес е корекција на историјата и враќање на рамнотежата на меѓународниот поредок по падот на Советскиот Сојуз“, соопшти кабинетот на Асад.

„Сирија е на страната на Русија бидејќи е убедена во валидноста на нејзината позиција“, рече Асад.

„Противењето на проширувањето на НАТО е руско право“, додаде тој, додавајќи дека НАТО е „глобална закана“ и „инструмент за спроведување на неодговорни западни политики насочени кон дестабилизација на светот“.

Дамаск е лојален сојузник на Русија, која воено интервенира во Сирија од 2015 година, давајќи им поддршка на силите на Асад во борбата против џихадистите. Руската интервенција се смета за пресвртница што му овозможи на режимот на Асад да опстане на власт.

Според Москва, повеќе од 63.000 руски војници се распоредени во Сирија.

„Западните нации се одговорни за хаосот и крвопролевањето“, рече Асад во разговорот со Путин.

Во војната во Сирија загинаа речиси 500.000 луѓе од нејзиниот почеток во март 2011 година.