Сијарто: Унгарија не ја прифаќа одлуката на ЕУ за откажување на увозот на руски енергетски производи

Унгарија не може да ја прифати и спроведе одлуката на Европската Унија за постепено укинување на увозот на руска енергија, бидејќи таквата одлука ја загрозува енергетската безбедност на земјата, изјави денес унгарскиот министер за надворешни работи Петер Сијарто.

Тој, исто така, рече дека Унгарија и Словачка ќе поведат судска постапка против таа одлука пред Судот на правдата на Европската Унија штом ќе биде финализирана, објавува Ројтерс.

Европскиот совет претходно денес објави дека е постигнат договор со Европскиот парламент за постепено укинување на увозот на руски гас до 2027 година, како дел од напорите за ставање крај на енергетската зависност од Русија.

Регулативата претставува правно обврзувачка, фазна забрана за увоз и на течен природен гас (LNG) и на гас преку цевководи од Русија, со целосна забрана што ќе започне кон крајот на 2026 година за LNG и есен 2027 година за цевководи.

Како што е наведено во соопштението, ова придонесува за општата цел за постигнување на отпорен и независен енергетски пазар на ЕУ, со одржување на безбедноста на снабдувањето.

Привремениот договор сега треба да биде одобрен од Советот и Парламентот пред неговото формално усвојување.

Уделот на рускиот гас во увозот на ЕУ изнесуваше 12 проценти во октомври, значително помалку од околу 45 проценти пред почетокот на војната во Украина во 2022 година.

Унгарија, Франција и Белгија остануваат меѓу земјите-членки кои продолжуваат да увезуваат руски гас, пренесува Танјуг.

Фото:ЕПА

Текстот Сијарто: Унгарија не ја прифаќа одлуката на ЕУ за откажување на увозот на руски енергетски производи е превземен од МАКФАКС.