Србија ги ублажи мерките – се отвораат угостителските објекти

Кризниот штаб на Србија одлучи да дозволи отворање на терасите на угостителските објекти од понеделник, со посебни мерки, како и продолжување на работата на продавниците до 22 часот.

„Ја анализиравме епидемиолошката состојба во Србија. Сè уште е вонредна. Одлучивме од понеделник да се овозможи работа на угостителски објекти кои имаат можност за работа на отворено, под услови што ќе ги прецизираме со епидемиолозите и ќе ги откриеме најдоцна во недела. Викендов ќе разговараме за трговските центри и ќе се обидеме да најдеме решение“, изјави Зоран Гојковиќ.

Тој додаде дека ако порасне бројот на вакцинирани граѓани, мерките и забраните ќе се ублажуваат сукцесивно.

Според него, повеќе од 25 проценти од возрасните граѓани ја примиле првата доза на вакцината, а над милион граѓани, што е 18,6 проценти, ја примиле втората доза.

„Вечерва треба да пристигне првиот контингент од програмата Ковакс – 56.000 дози од ‘Астра зенека’, а од понеделник 500.000 вакцини од ‘Синофарм’ и 106.000 вакцини од ‘Фајзер’“, рече Гојковиќ.