Талибанците забранија прикажување фотографии од луѓе и животни во медиумите

Талибанските медиуми престанаа да прикажуваат фотографии од живи суштества – луѓе и животни – во некои авганистански провинции за да се усогласат со законите за морал, соопштија денеска официјални лица, пренесуваат медиумите во регионот.

Во август Министерството за промоција на доблеста објави закони со кои се регулираат аспектите од секојдневниот живот, како што се јавниот превоз, медиумите и прославите.

Членот 17 забранува објавување фотографии на живи суштества, што предизвикува загриженост за последиците за авганистанските медиуми и слободата на печатот.

Портпаролот на Министерството за промоција на доблеста, Саиф ул Ислам Хајбер, рече дека владините медиуми во провинциите Тахар, Мајдан Вардак и Кандахар се советувани да не емитуваат или да не прикажуваат фотографии од „сè што има душа“, што значи луѓе и животни.

Хајбер рече дека Министерството е одговорно за спроведување на законите за морал, но не појасни дали правилата важат за сите медиуми, вклучително и странските, или само за авганистанските канали и веб-страници, а не кажа ни како ќе се спроведуваат законите.

За време на нивното претходно владеење во доцните 90-ти, талибанците целосно ги забранија повеќето телевизии, радиостаници и весници, според написите.

Текстот Талибанците забранија прикажување фотографии од луѓе и животни во медиумите е превземен од МАКФАКС.