Фаучи: До крајот на летото ќе видиме напредок во борбата против коронавирусот

Водечкиот имунолог во САД, Ентони Фаучи, изјави дека до крајот на летото или почетокот на есента ќе се забележи голем напредок во борбата против Ковид-19.

„Има светло на крајот од тунелот. До крајот на летото, на почетокот на есента, ќе видиме голем напредок“, изјави Фаучи за телевизијата „Ен-би-си“, пренесе Гласот на Америка.

Ковид однесе околу 530.000 животи во Америка, каде што околу 10 проценти од населението беше ревакцинирано.

Советникот во Белата куќа, Енди Слевит, за МСНБЦ изјави дека е сè поголем пооптимист дека земјата може да го заштити најранливото население.

„Треба да сториме повеќе и да ги забрзаме напорите во следните неколку недели и месеци за да го постигнеме тоа, а тоа ќе го слушнете и од претседателот“, рече Слевит.

До средата наутро во САД се распределени речиси 128 милиони дози вакцина, а примени се речиси 96 милиони, покажуваат владините податоци.

Денес беше објавено видео во кое поранешните американски претседатели и нивните жени ги охрабруваат Американците да се вакцинираат, но Доналд Трамп и неговата сопруга Меланија не се меѓу нив.