Хакерски напад врз САД, прстот се вперува кон Северна Кореја

Министерството за правда на САД обвини тројца севернокорејски програмери за големи хакерски напади, вклучувајќи банки и филмско студио. Покрената е нова кривична постапка против уште двајца севернокорејски хакери и таа е продолжение на претходната кривична постапка поведена во 2018 година против еден севернокорејски државјанин.

Обвинителите велат дека сите тројца програмери се членови на военоразузнавачката агенција на Владата на Северна Кореја. Тие го обвинуваат Генералното биро за разузнавање, највисоката служба за разузнавање на Северна Кореја, за учество во глобален заговор во кој украле од банки и компании криптовалути во вредност од 1,3 милијарди долари, како како и за упад во филмското студио Сони во 2014 година заради холивудски филм којшто не и се допаднал на севернокорејската влада.

„Како што е наведено во денешното обвинение, севернокорејските оперативци, користејќи тастатури наместо пиштоли, крадејќи дигитални паричници со криптовалути наместо вреќи со готовина, се водечки разбојници на банки во светот“, рече Џон Демерс, помошник на државниот обвинител и високо официјално лице во Министерството за правда.