Шефот на НАТО вети 60 милијарди долари воена помош за Украина

Генералниот секретар на НАТО, Марк Руте, вети дека членовите на Aлијансата ќе ѝ обезбедат на Украина 60 милијарди долари воена помош во 2026 година. Руте го објави ова денеска во Берлин, на отворањето на Контакт групата за одбрана на Украина, позната како Рамштајн формат.

Се очекува членките на НАТО да ѝ обезбедат на Украина 60 милијарди долари воена помош оваа година, вклучувајќи средства од заеми од Европската унија.

„Мора да се осигураме дека Украина ќе ја добие поддршката што ѝ е потребна. Сите сојузници мора да инвестираат повеќе за да ја достигнат целта од 60 милијарди долари – 60 милијарди долари помош за безбедноста и одбраната на Украина оваа година“, рече Руте.

Тој нагласи дека „сите средства од заемот на ЕУ за поддршка на Украина мора да дојдат како додаток на она што сојузниците го ветуваат билатерално“.

„Треба да ги фокусираме средствата на приоритетите – воздушна одбрана, беспилотни летала и муниција со долг дострел. Ова се клучни приоритети“, рече лидерот на НАТО.

Тој, исто така, спомена дека механизмот PURL, кој им овозможува на членките на НАТО да купуваат американско оружје за Украина, ќе продолжи да функционира во 2026 година.

Шефот на Алијансата, исто така, посочи на нееднаквата распределба на трошоците меѓу земјите-членки што ѝ помагаат на Украина.

„Пред самитот на НАТО во Анкара, мора да постигнеме напредок и во обезбедувањето пофер и попредвидлив пристап кон поддршката на одбранбените напори на Украина. Ова е вистински проблем. Премалку земји носат преголем дел од товарот и ние треба да го поправиме тоа. Поддршката на борбата на Украина е важна – поважна од кога било“, рече Руте.

Контакт групата за одбрана на Украина моментално се состанува во Берлин, каде што учесниците дискутираат за зголемување на воената поддршка за Украина, со фокус на беспилотни летала и ракети со долг дострел. Министерот за одбрана на САД, Пит Хегсет, повторно не присуствува на состанокот.

Руте, претходно вети за време на неговата посета на Украина дека ќе обезбеди повеќе од 15 милијарди долари за купување оружје за украинските вооружени сили во рамките на механизмот PURL. Претходно беше објавено дека Европската комисија предлага да издвои 45 милијарди евра за Украина до 2026 година, од кои 16,7 милијарди евра ќе одат во украинскиот буџет, а 28,3 милијарди евра за армијата, одбраната и производството на оружје.

Текстот Шефот на НАТО вети 60 милијарди долари воена помош за Украина е превземен од МАКФАКС.