Џонсон вели дека ја платил казната поради ковид журката за време на заклучувањето

Британскиот премиер Борис Џонсон изјави дека ја платил казната за кршење на правилата за изолација поради коронавирусот донесени од неговата влада.

Од истата причина, лондонската полиција казни повеќе од 50 лица, меѓу кои и учесниците на забавата во британската влада во пресрет на погребот на сопругот на британската кралица, принцот Филип.

Џонсон учествуваше на забавата, се извини за таа грешка и рече дека не му паѓа на памет дека собирот на неговиот роденден, во јуни 2020 година, може да биде кршење на правилата, пишуваат британските гласила.

Лондонската полиција денеска го известила и министерот за финансии Риши Сунак дека ќе биде казнет.

Извештаите за забави во градината на Даунинг стрит за време на пандемијата на коронавирусот првпат се појавија во декември, но тогаш Џонсон ги негираше тврдењата дека не ги почитувал сите мерки.

Казната ќе мора да ја плати и сопругата на Џонсон, Кери Џонсон.

Лондонската полиција ги истражуваше наводите за 12 собири на Даунинг стрит за време на карантинот и изрече повеќе од 50 казни, а се очекува да бидат и повеќе.

Портпаролката на организацијата „Семејствата на ужалените бараат правда“ Лоби Акинола рече дека е неверојатно болно да се дознае дека такви високи функционери биле на забави, додека семејствата не може да бидат со најблиските на погреб.

Либералите предлагаат седница на парламентот, кој е на велигденска пауза, за да му се изгласа недоверба на Џонсон, додека владејачката Конзервативна партија бара јавно извинување од официјалните лица.

Осудените можат да ја платат сумата во рок од 28 дена или да се жалат на полициското решение. Во тој случај, полицијата го разгледува случајот и ја повлекува казната или предметот го предава на суд.

Прекршочните казни за прекршување на мерките за коронавирус не се вклучени во криминалното досие, пишува Би-Би-Си.