Kомитет на британски пратеници и лордови: Подгответе се за „најлошото можно сценарио“

Обединетото Кралство и неговите европски сојузници во НАТО мора да се подготват за „најлошото можно сценарио“ во кое САД нема да ги бранат во случај на криза, предупреди влијателниот комитет на британски пратеници и лордови.

Зголемената непредвидливост на безбедносните приоритети на Белата куќа ги доведува во прашање основните претпоставки на НАТО за одбраната на Европа, која отсекогаш се потпирала на верувањето дека американските вооружени сили ќе бидат доминантна сила на страната на сојузниците во евентуална војна, пишува „Скај њуз“.

Предупредувањето, издадено во петок, доаѓа откако американскиот претседател Доналд Трамп повторно ги критикуваше своите сојузници – а особено Обединетото Кралство – за тоа што не се придружија на неговата војна против Иран.

Тој подбивно ги нарече двата носачи на авиони на Кралската морнарица „играчки“, додека ги обвинуваше другите членки на НАТО дека „не прават апсолутно ништо“ за да помогнат во борбата против иранскиот режим, според медиумот.

Во објава на социјалните медиуми, претседателот додаде: „На САД не им треба ништо од НАТО, но „никогаш не го заборавајте“ овој многу важен момент.“

Трамп, исто така, постојано го критикуваше британскиот премиер Кир Стармер како некој што не е ниту налик на Винстон Черчил.

Заедничкиот комитет за стратегија за национална безбедност го повика Лондон да „развие план за дистанцирање од билатералните односи со Соединетите Американски Држави од кои е толку зависен во однос на нуклеарните и разузнавачките операции и конвенционалната одбрана“.

Тој, исто така, им препорача на Обединетото Кралство, Европа и Канада да развијат план „за движење кон поголемо европско лидерство во рамките на НАТО“.

Комитетот, исто така, нагласи дека, иако владата треба да продолжи да соработува со САД каде што е практично, мора да има и јасен план.

„Подготвувајќи се за „најлошото можно сценарио“ во кое Европа повеќе не може да се потпира на американска поддршка во случај на криза, владата мора да работи со европските партнери за да инвестира во нивните капацитети и со тоа да го компензира ова потенцијално повлекување“, се додава во извештајот.

Комитетот ги наведе областите од особена загриженост, вклучувајќи ја зависноста на Велика Британија од САД за одржување на своите ракети „Тридент“, договорите за споделување разузнавачки информации, испораката на борбени авиони Ф-35 и новиот план за изградба на напаѓачки подморници.

Извештајот предупредува на можноста Трамп да ја искористи секоја моќ што ја има против сојузниците ако направат нешто што не му се допаѓа.

Осврнувајќи се на зависноста на Велика Британија од САД во различни одбранбени и безбедносни домени, во извештајот се вели: „Постојат докажани области на тензија во односите меѓу Велика Британија и САД кои би можеле да ја загрозат сигурноста на таа зависност во блиска иднина“, според написите.

Текстот Kомитет на британски пратеници и лордови: Подгответе се за „најлошото можно сценарио“ е превземен од МАКФАКС.