Алжир ги прекина дипломатските односи со ОАЕ: амбасадорот има рок од 48 часа да ја напушти земјата

Алжир вчера ненадејно ги прекина дипломатските односи со Обединетите Арапски Емирати (ОАЕ), наведувајќи низа потези на Абу Даби кои ги опиша како „провокативни или непријателски“, но не прецизираше за кој конкретен потег станува збор.

Министерството за надворешни работи на ОАЕ подоцна изрази надеж дека одлуката на Алжир за прекин на дипломатските врски ќе биде привремена. Абу Даби соопшти дека останува посветен на зачувување на врските меѓу народите на двете земји и нивните заеднички интереси, пренесува Ројтерс.

Односите меѓу двете земји се сè позатегнати во последните години, а алжирските медиуми остро ги критикуваат ОАЕ и ги обвинуваат за поттикнување регионални поделби. Алжирското Министерство за надворешни работи изјави дека постапките на ОАЕ повеќе не се прифатливи ниту толерантни и дека Алжир ги „исцрпил сите средства за зачувување на билатералните односи“.

ОАЕ: Дипломатските односи не треба да се засноваат на загатки

Анвар Гаргаш, дипломатски советник на претседателот на ОАЕ, напиша на социјалната мрежа „Икс“ дека дипломатските односи треба да се засноваат на „разумност, комуникација и јасност на интересите“, а не на „загатки и сигнали што треба да се дешифрираат“.

Гаргаш експлицитно не го спомна Алжир, ниту пак ги поврза своите коментари со оваа одлука. Тој истакна дека успешната дипломатија зависи од јасни ставови и ефективно управување со интересите и несогласувањата.

Делумно затворање на воздушниот простор

По одлуката за прекин на дипломатските односи со ОАЕ, Алжир од денеска го затвора својот воздушен простор за сите цивилни и воени авиони регистрирани во ОАЕ, објави телевизијата Ennahar, повикувајќи се на алжирското Министерство за одбрана.

Комерцијалните летови на ОАЕ кон и од Алжир ќе бидат изземени од забраната до крајот на 2026 година, кога истекува постоечкиот договор, додаде министерството.

Текстот Алжир ги прекина дипломатските односи со ОАЕ: амбасадорот има рок од 48 часа да ја напушти земјата е превземен од МАКФАКС.