Американското оружје е веќе во Украина – министерот за одбрана чека повеќе испораки

Украинската армија веќе добила оружје обезбедено од САД како дел од најновиот пакет воена помош, изјави во петокот министерот за одбрана Алексеј Резников.

Кон крајот на декември, претседателот Џо Бајден одобри безбедносен пакет од 200 милиони американски долари за Украина, кој вклучува оружје и одбранбена помош, како што се противтенковски ракети и муниција за системот Javelin.

Резников во четвртокот објави дека седмиот авион со 85 тони американска воена помош пристигнал во Украина.

Продолжените тензии околу Украина се интензивираа во последните недели, а НАТО изрази загриженост поради наводното трупање војници во близина на украинската граница и ги повика сојузниците да ја засилат својата воена поддршка за Киев.

САД, Обединетото Кралство, Канада и балтичките земји веќе и доставија на Украина неколку серии оружје, главно пиштоли, муниција и противтенковско оружје.

Русија постојано ги негираше наводите за подготовки за инвазија на Украина и го критикуваше провокативното воено зајакнување на НАТО во регионот.