Аншобер: До лето ќе бидат вакцинирани 63 проценти од возрасните граѓани во Австрија

Австрискиот министер за здравство Рудолф Аншобер очекува дека, доколку нема нови проблеми со испораката на вакцини, повеќе од 4,6 милиони луѓе или околу 63 проценти од возрасните ќе бидат вакцинирани во Австрија до крајот на вториот квартал.

Австрија очекува да добие околу два милиони дози во првиот квартал, а други шест милиони во вториот.

Покрај тоа, првите 687.000 дози од вакцината на „Џонсон и Џонсон“ ќе пристигнат во вториот квартал, тврди Аншобер.

„Поранешната испорака на десет милиони дози на ‘Бионтек-Фајзер’ објавена од Европската комисија значи дека Австрија ќе може да очекува околу 200.000 дози“, нагласи тој.

Од јули, тврди тој, се планираат уште 11 милиони дози на веќе одобрени вакцини за третиот квартал.

Вкупно, Австрија нарача 11,1 милион дози од „Бионтек-Фајзер“, 6,9 милиони дози вакцина од „Астразенека“, 4,7 милиони дози вакцина од „Модерна“, 3 милиони дози „Кјурвакс“, 2,5 милиони дози од „Џонсон и Џонсон“ и 1,2 милиони дози вакцина од „Валнева“.

Аншобер објасни дека во времето на првиот пакет за набавки од есен, нарачката требало да се изврши без постоење на одобрение за вакцина, без да се знае кога ќе добијат дозвола и колку количини можат да бидат испорачани.

Затоа, било одлучено да се нарачаат што е можно повеќе различни производи за планираните 200 милиони евра.

При нарачката, Австрија се потпираше особено на оние вакцини за кои се очекуваше брзо одобрување, бидејќи целта е да се вакцинира населението до летото.