(Видео) Вдовицата на Навални ги повика Русите да протестираат: На изборите фрлете го ливчето, напишете Навални

Јулија Навална, вдовица на критичарот на Кремљ, Алексеј Навални, ги повика Русите да се приклучат на протестот на 17 март, денот на изборите, и да гласаат против рускиот претседател Владимир Путин или да ги уништат нивните гласачки ливчиња. Навална во видеото на „Јутјуб“ рече дека црпи надеж од големиот број луѓе што се појавија минатата недела на погребот на нејзиниот сопруг, кој почина во арктичкиот затвор на 16 февруари. Неговиот гроб оттогаш е покриен со море од цвеќиња.

„Мора да го искористиме денот на изборите за да покажеме дека постоиме и дека нè има многу. Ние сме вистински, живи луѓе и сме против Путин. Мора да пристигнете на гласачкото место тој ден во исто време, на 17 март напладне“, таа рече. Нејзиниот сопруг имал идеја дека демонстрантите на тој начин ќе го избегнат ризикот од апсење.

17 марта. Полдень. За Навального. pic.twitter.com/9fxFxt0NOY

— Yulia Navalnaya (@yulia_navalnaya) March 6, 2024

„Што да направите следно? Изборот е ваш. Можете да гласате за кој било кандидат, освен за Путин. Можете да го уништите гласачкото ливче, да напишете ‘Навални’ на него со големи букви. Дури и ако воопшто не ја гледате смислата на гласањето, само дојдете и застанете покрај гласачкото место, а потоа заминете дома“.

По смртта на сопругот, Навална најави дека ќе ја продолжи неговата борба. Таа се појави на голем број политички настани на Запад, вклучувајќи ги безбедносната конференција во Минхен и Европскиот парламент, а се сретна и со американскиот претседател Џо Бајден. Кремљ ги отфрла тврдењата на Навална дека Путин го убил нејзиниот сопруг и одби да го коментира јавниот одговор за неговата смрт и погребот.

Текстот (Видео) Вдовицата на Навални ги повика Русите да протестираат: На изборите фрлете го ливчето, напишете Навални е превземен од МАКФАКС.