(Видео) Израелскиот амбасадор во ОН влезе во жестока расправија со претставничка на Обединетите нации

Израелскиот амбасадор во Обединетите нации, Дани Данон, влезе во вербален судир со високи претставници на организацијата за време на настан во Генералното собрание на ОН посветен на Меѓународниот ден за борба против сексуалното насилство во конфликти.

За време на својот говор, Данон остро ја критикуваше Прамила Патен и побара нејзина оставка поради извештај од 2025 година во кој се документирани случаи и обрасци на сексуално насилство врз Палестинци притворени во Израел и на окупираните палестински територии.

„Бидете тивки“

Додека Данон ја обвинуваше Патен дека подлегнала на, како што рече, „опсесијата на генералниот секретар против Израел“, се обиде да интервенира Ванеса Фрејзер, барајќи процедурална забелешка.

Израелскиот дипломат реагираше со повишен тон и ѝ порача: „Не, вие ќе бидете тивки! Сега јас зборувам. Срам да ви е.“

Фрејзер возврати дека расправата не треба да стане лична и повторно побара можност да ја изнесе својата процедурална забелешка, но Данон продолжи со критиките кон претставниците на ОН.

“You will be quiet”.

A UN meeting turned heated after Israel’s ambassador accused the body of unfairly targeting Israel over allegations against its soldiers and security forces. Israel was recently added to a UN blacklist for conflict-related sexual violence. pic.twitter.com/l8lyaTHIPv

— Al Jazeera English (@AJEnglish) June 20, 2026

Спорни извештаи на Обединетите нации

Судирот доаѓа во период на зголемени тензии меѓу Израел и Обединетите нации околу неколку извештаи поврзани со состојбата на Палестинците.

Во извештајот на Фрејзер, израелската армија и безбедносните сили се ставени на црна листа поради сериозни прекршувања на правата на палестинските деца. Во документот се наведува дека бил регистриран рекорден број прекршувања откако пред три децении бил воспоставен механизмот за следење на ваквите случаи.

Во извештајот на Патен за сексуалното насилство од 2025 година, меѓу другото, се наведува дека Израел не им овозможил на телата на ОН целосен пристап за следење на состојбата на терен, додека испораката на хуманитарна помош останала сериозно ограничена.

Израелските власти ги отфрлаат ваквите наоди и тврдат дека организацијата покажува пристрасност кон Израел.

Текстот (Видео) Израелскиот амбасадор во ОН влезе во жестока расправија со претставничка на Обединетите нации е превземен од МАКФАКС.