Возач во трка во Teксас изгуби контрола и удри во гледачите – загинаа две деца, а осум се повредени

Две момчиња загинаа, а осум лица се повредени кога возач изгуби контрола за време на мото трка во Тексас на пистата на аеродромот и удри во гледачите, соопштија властите.

Шестгодишно и осумгодишно момче загинаа вчера попладне, на настан наречен „Аеродромски војни 2“ на аеродромот во округот Кервил-Кер, соопшти полицијата, пренесе АП.

Настанот го следеа илјадници луѓе, а возачите се тркаа по пистата натпреварувајќи се за парична награда.

Возачот изгубил контрола и излетал од пистата, удирајќи во паркирани возила и гледачи кои ги следеле трките. Повредените биле пренесени во различни болници, меѓу кои и 46-годишна жена која била во критична состојба.

Се верува дека повеќето од другите повредени не добиле повреди опасни по живот, иако состојбата на 26-годишен маж е непозната, соопштија властите.

Во болница превентивно се пренесени четиригодишно момче и тримесечно девојче.

Властите не го соопштија идентитетот на двете деца кои беа убиени во инцидентот што се случи на околу 97 километри северозападно од Сан Антонио.