Израел ги проширува операциите во Газа, зголемувајќи ги тензиите во регионот

Израелската армија денеска ги прошири своите операции во Појасот Газа, каде што се зголемува бројот на загинати палестински цивили. Растат тензиите во регионот, а за време на викендот имаше вооружени напади во Ирак и Црвеното Море.

„Израелската армија продолжува да ја шири својата копнена операција против Хамас низ појасот Газа. Армијата дејствува секаде каде што Хамас има упоришта“, изјави доцна синоќа воениот портпарол Даниел Хагари.

Израелските војници се ангажирани во копнена офанзива од 27 октомври на северот на Газа, каде што презедоа контрола на неколку места. Бидејќи борбите продолжија во петокот по истекот на еднонеделното примирје со Хамас, војската главно се фокусираше на воздушни напади.

Во текот на ноќта, во напад на влезот на болницата Камал Адван, лоцирана во северниот дел на Газа, загинаа неколку луѓе, според палестинската новинска агенција Вафа, а владата на Хамас ја обвини израелската армија за „сериозно кршење“ на меѓународното хуманитарно право.

Израел го обвинува палестинското движење Хамас дека ја постави својата инфраструктура во или под болниците и дека користи цивили како жив штит.

Франс прес додава дека тензиите се шират во регионот. Во текот на викендот, пет проирански борци беа убиени во напад во Ирак, додека јеменските бунтовници Хути, поддржани од Иран, кои и самите ги поддржуваат Палестинците, нападнаа два брода во Црвеното Море.

Текстот Израел ги проширува операциите во Газа, зголемувајќи ги тензиите во регионот е превземен од МАКФАКС.