Иран е подготвен за преговори со САД, но бара укинување на блокадата

Техеран е подготвен за разговори штом САД ја укинат блокадата, изјави иранскиот амбасадор во ОН, Амир-Саид Иравани. Како предуслов за каква било нова рунда преговори, Иравани рече дека САД мора да престанат да „го кршат прекинот на огнот“, објави иранскиот медиум Шарг, а пренесе Ал Џезира.

„Штом блокадата биде укината, следната рунда разговори ќе се одржи во Исламабад“, рече Иравани, додавајќи дека „Иран е подготвен за какво било сценарио“. „Ние не сме започнале воена агресија. Ако тие бараат политичко решение, ние сме подготвени. Ако тие бараат војна, Иран е подготвен и за тоа“, заклучи иранскиот амбасадор.

Во исто време, продолжувањето на преговорите е сè понеизвесно. Иако безбедносните подготовки за нова рунда разговори сè уште се во тек во пакистанскиот главен град Исламабад, оптимизмот значително се намали и е сè поневеројатно дека состанокот ќе се одржи оваа недела.

Тензиите растат и на терен. Иран повторно се закани дека ќе нападне американски и израелски цели ако продолжи она што го нарекува „агресија“ против Техеран, а висок воен командант ги предупреди соседните земји дека би можеле да им снема нафта ако дозволат нивната територија да се користи за напади врз Иран.

Текстот Иран е подготвен за преговори со САД, но бара укинување на блокадата е превземен од МАКФАКС.