Калас: Одлуката на САД да ги ублажи санкциите врз руската нафта не можеше да дојде во полошо време за Украина

Неодамнешната одлука на Соединетите Американски Држави за ублажување на санкциите врз руската нафта не можеше да дојде во полошо време за Украина, изјави денес шефицата за надворешна политика на Европската Унија, повикувајќи ја Европа да воведе построги мерки против Москва.

„Живееме во многу, многу турбулентни времиња и постои јасна врска помеѓу нелегалната агресија на Русија врз Украина и она што се случува на Блискиот Исток“, изјави Каја Калас за време на обраќањето пред европратениците во Комитетот за надворешни работи на Европскиот парламент.

„И двата конфликти се производ на ерозијата на меѓународното право без одговорност, без разлика дали е судска или политичка“, додаде таа.

„Ова не е европска војна. Ние не ја започнавме војната. Не бевме консултирани и не ги знаеме вистинските цели на овој конфликт. Затоа земјите-членки не сакаат да бидат вовлечени во него“, објасни Калас.

Таа истакна дека Русија профитира од повисоките цени на енергијата и прекините во Ормутскиот теснец, што ѝ овозможува да ја продолжи војната во Украина.

„Одлуката на САД да ги ублажи санкциите врз руската нафта не можеше да дојде во полошо време за Украина. Европа мора да ги ублажи зголемените енергетски профити на Русија со зголемување на сопствениот притисок од санкции и демонтирање на флотата во сенка на Москва“, рече Калас.

Таа ги критикуваше одложувањата на ЕУ во финализирањето на дваесеттиот пакет санкции и заеми за помош на Украина, велејќи дека неможноста да се постигне напредок во овие мерки ја загрозува безбедноста на Европската Унија.

Зборувајќи за нормализацијата на односите со Русија, Калас ја нагласи потребата од јасна агенда.

„Првото прашање е, за што сакаме да разговараме со Русите? Мировните преговори сега се во застој, а всушност другата страна е целосно отсутна. Сите вршат притисок врз Украина, но никој не поставува прашања на Русија. Ако продолжиме вака, жал ми е, ќе бидеме полоши“, рече таа.

Текстот Калас: Одлуката на САД да ги ублажи санкциите врз руската нафта не можеше да дојде во полошо време за Украина е превземен од МАКФАКС.