Мелони признава: Не очекував дека работите со Трамп ќе се одвиваат вака

Италијанската премиерка Џорџа Мелони денес изјави дека очекува соработката со американскиот претседател Доналд Трамп да биде полесна поради нивните слични политички ставови, но дека тоа не се случило на долг рок откако Трамп се сврте против неа поради нејзиното одбивање да ја поддржи војната на САД против Иран.

„Јасно е дека мислев дека работите ќе бидат полесни со Доналд Трамп, со оглед на нашите заеднички ставови за имиграцијата и „разбудената“ култура. Работите се одвиваа поинаку“, рече Мелони во интервју за „Њујорк Тајмс“.

Таа изјави дека не разговарала со Трамп неколку недели, пренесува Анса.

Кога ја прашаа дали ќе бидат во контакт по летниот одмор, Мелони се двоумеше и одговори: „Ќе видиме“.

„Сè уште верувам дека единството на Западот е многу важно. Не ја одредувам стратегијата на Италија врз основа на моите лични односи“, рече италијанската премиерка.

Мелони истакна дека не сака „покорна Италија“ која се смета себеси за инфериорна во однос на другите земји и дека сака да започне „револуција на гордоста“.

„Не ми се допаѓа кога луѓето ми кажуваат кои се моите граници“, рече таа.

Мелони, единствениот лидер на ЕУ поканет на инаугурацијата на Трамп, по самитот на НАТО во Анкара минатиот месец изјави дека не жали за својот однос со Трамп, и покрај нивниот конфликт околу војната во Иран, и дека сè уште сака да го зачува единството на Западот.

Трамп претходно рече дека Италија постапила „многу лошо“ во однос на одлуките за користење на нејзините воени бази.

За време на војната со Иран во март, Италија одби да им дозволи на американските бомбардери да ја користат воздухопловната база „Сигонела“ на Сицилија.

Текстот Мелони признава: Не очекував дека работите со Трамп ќе се одвиваат вака е превземен од МАКФАКС.