Меркел со нов план: олабавувањето ќе оди во три фази, а ќе има повеќе тестирања

Германската канцеларка сака спроведување на планот за постепено укинување на ограничувањата во државата, поврзано со зголемен број на тестирања.

Тоа го изјавиле двајца учесници на состанокот на раководството на Одборот на Христијанско-демократската унија, партијата на Меркел.

Меркел сака повторно да ги отвори деловите на општеството во три фази, почнувајќи од проширувањето на бројот на лични контакти, потоа отворање на училиштата и стручните училишта и трето – отворање на спортските групи, ресторани и културата, навеле учесниците на состанокот, пренесува „Ројтерс“.

Германија до 7 март ги продолжи ограничувањата за да го спречи ширењето на коронавирусот, иако основните училишта и градинките од денеска почнаа со работа во 10 германски покраини, а фризерските салони треба повторно да ги отворат своите врати следната недела.

Бројот на новите дневни инфекции стагнира за време на изминатата недела со седумдневна стапка на инциденца која се движи околу 60 случаи на 100.000 жители.

Бројот на лица заразени со Ковид-19 во последните 24 часа во Германија е 4.369, додека истовремено биле регистрирани 62 смртни случаи.