Нетанјаху го поздрави усвојувањето на резолуцијата на ОН за планот на Трамп за Газа

Израелскиот премиер Бенјамин Нетанјаху го поздрави гласањето на Советот за безбедност на Обединетите нации за усвојување на резолуцијата предложена од САД, со која се одобрува воспоставување на Меѓународните сили за стабилизација во Газа како дел од планот од 20 точки на американскиот претседател Доналд Трамп, наведувајќи дека планот ќе помогне да се стави крај на владеењето на палестинската милитантна група Хамас и да се прошири нормализацијата.

На својот официјален профил на платформата X, Нетанјаху го пофали планот на Трамп и поддршката од Советот за безбедност на ОН, наведувајќи дека рамката „ќе доведе до мир и просперитет бидејќи инсистира на целосна демилитаризација, разоружување и дерадикализација на Газа“, што, во согласност со визијата на американскиот претседател Доналд Трамп, ќе доведе до понатамошна интеграција на Израел и неговите соседи, како и до проширување на Аврамските договори, објавува „Тајмс оф Израел“.

Нетанјаху додаде дека според планот на Трамп, од Израел се очекува без одложување да ги прими преостанатите тројца починати заложници во Газа и да го започне процесот на разоружување и демилитаризација на Појасот Газа и ставање крај на владеењето на Хамас над Газа.

„Раководството на претседателот Трамп ќе му помогне на регионот да постигне мир, просперитет и траен сојуз со САД“, напиша тој.

Нетанјаху истакна дека Израел им подава рака на сите свои соседи за мир и просперитет и ги повикува да ги нормализираат односите со Израел и да му се придружат во протерувањето на Хамас и неговите поддржувачи од регионот.

Во исто време, палестинската министерка за надворешни работи Варсен Агабекијан Шахин изјави дека усвојувањето на резолуцијата на Советот за безбедност на ОН со која се поддржува планот на американскиот претседател Доналд Трамп за прекин на војната во Газа е неопходен прв чекор на долгиот пат кон мирот, пренесува Ројтерс.

„Резолуцијата на ОН е првиот чекор на долгиот пат кон мирот. Тој чекор беше неопходен бидејќи нема да можеме да започнеме ништо друго пред да имаме примирје“, изјави Шахин за новинарите во Манила за време на нејзината посета на Филипините.

Шахин рече дека сè уште има други прашања што треба да се решат, вклучувајќи го палестинското право на самоопределување и евентуалната палестинска независност, и дека процесот на спроведување на планот на Трамп мора да биде во согласност со меѓународното право.

Таа рече дека иако планот на Трамп алудира на можна палестинска државност, прашањето може да се разгледа само откако Палестинската самоуправа ќе спроведе реформи. „Додека овие елементи се присутни, ние сме задоволни од овој прв чекор“, нагласи Шахин.

Фото: принтскрин

Текстот Нетанјаху го поздрави усвојувањето на резолуцијата на ОН за планот на Трамп за Газа е превземен од МАКФАКС.