Песков: Сите разлики со Европа можат да се решат само преку дијалог

Портпаролот на рускиот претседател, Дмитриј Песков, денес изјави дека ставот на Москва е дека сите несогласувања и конфликти со Европа треба да се решаваат на преговарачка маса и во заеднички интерес.

„Секоја постоечка контрадикција, секоја разлика во интересите на двете страни може и треба да се реши само на преговарачка маса“, изјави Песков за новинарите, пренесува РИА Новости.

Тој додаде дека Русија никогаш не го отфрлила дијалогот со Европа и дека секогаш е отворена за разговори, но дека најчесто нема реципроцитет.

„Русија никогаш не го отфрлила дијалогот. Ние, напротив, сакаме дијалог, но тоа обично не се случува во Европа“, рече Песков.

Портпаролот на Кремљ ги поздрави изјавите на одредени европски политичари кои, како што рече, изразија подготвеност да ги решат проблемите преку дијалог со Москва, вклучувајќи ги и ставовите на одредени лидери во регионот.

Во исто време, тој оцени дека е прерано да се зборува за општа промена во европскиот пристап кон Русија, наведувајќи дека од Брисел сè уште доаѓаат различни пораки.

Песков се осврна и на меѓународните прашања, велејќи дека Русија не учествува во преговорите меѓу САД и Иран, но дека е подготвена да придонесе за мирно решение доколку е потребно. Тој оцени дека ситуацијата во Ормускиот теснец е „кревка и непредвидлива“ и предупреди на можни последици доколку дојде до ескалација.

Зборувајќи за енергетските пазари, Песков нагласи дека Русија останува „клучен и одговорен играч“, со проценка дека глобалните пазари се во сложени услови во кои, како што наведе, обемот на руска нафта и гас е тешко да се заобиколи.

Текстот Песков: Сите разлики со Европа можат да се решат само преку дијалог е превземен од МАКФАКС.