Полски борбени авиони пресретнаа руски извидувачки авион над Балтичкото Море

Полски борбени авиони МиГ-29 повторно пресретнаа руски извидувачки авион Ил-20 над Балтичкото Море утрово, објави Оперативната команда на полските вооружени сили. Иако немало нарушување на полскиот воздушен простор, ова е трет ваков инцидент оваа недела, објавува „PolskieRadio24“.

Опасност за воздушниот сообраќај
Полските авиони МиГ-29 полетаа пред 9 часот утрово за да го идентификуваат рускиот авион. Оперативната команда извести дека рускиот авион повторно летал без вклучен транспондер и без претходно доставен план за лет.

„Рускиот авион повторно се движел без доставен план за лет и со исклучен транспондер, што претставува потенцијална закана за безбедноста на сообраќајот во регионот“, се вели во соопштението.

Полските пилоти, во согласност со процедурите на НАТО, го пресретнаа, идентификуваа и придружуваа странскиот авион, според написите.

„Остануваме во целосна борбена готовност“
Според полската команда (DORSZ), активноста на руските воздухопловни сили во балтичкиот регион се зголемува. Затоа, полската армија е во целосна готовност и подготвена да реагира.

„Полската армија останува во целосна борбена готовност и ефикасно одговара на сите провокативни дејствија на Руската Федерација, дејствувајќи во тесна соработка со сојузниците на НАТО“, се заклучува во соопштението.

Фото: принтскрин

Текстот Полски борбени авиони пресретнаа руски извидувачки авион над Балтичкото Море е превземен од МАКФАКС.