Русија до Германија: Никој нема да ја нападне Украина, не драматизирајте

Русија ги отфрли заканите од Германија дека нема да го пушти во употреба контроверзниот гасовод Северен тек 2 во случај на руска инвазија на Украина.

Прашањето за гасоводот не требаше да се „драматизира“, изјави заменик-министерот за надворешни работи Сергеј Рјабков за списанието за надворешна политика „Международна Жизн“.

„Никој нема да ја нападне Украина“, рече тој.

Тој го обвини Западот дека го користи гасоводот од Русија до Германија како „адут за преговори“ и средство за притисок врз Москва.

Новата германска министерка за надворешни работи Аналена Баербок изјави дека во случај на руски напад врз Украина, работата на контроверзниот гасовод Северен тек 2 на Балтичкото Море меѓу Русија и Германија ќе биде забранета.

Со недели, извештаите за наводните руски подготовки за инвазија на Украина предизвикуваат меѓународна тревога. ЕУ и НАТО и се заканија на Москва со тешки последици во случај на воена ескалација.

Москва бара да се стави крај на проширувањето на НАТО кон исток, што го гледа како закана. Вклучувањето на Украина во НАТО и распоредувањето на можни ракетни системи во близина на границата со Русија претставуваат закана за руската безбедност, изјави руски претставник.